Search
Add panel
[tiler debug info]
Choose a letter
Illustrissime domine,
Magno in moerore hic sumus manente adhuc principis electoris2 captivitate, quanquam quae ab Anglia ea de re habebat mandata regi3 exposuit illustrissimus D. comes Licestrius4. Sed Galli omnino volentes firmare quaesitum sibi in exercitum Vinariensem urbesque imperium non modo hoc negotium trahunt, sed et fratribus electoris5 dedere, qui eos observent, vetitis hinc discedere. Nec video, quomodo sanari possit hoc novum vulnus inflictum infortunatae domui, nisi rex Angliae6 in foedus cum Gallia veniat, qua de re nihildum quale velim intelligo.
Gallorum major quam prima tulit fama fuit ad Salzam clades validis quippe hostium castris machinisque et majore ea defendentium quam oppugnantium numero. Sed hoc damnum pensatur illato in Casale praesidio ad mille equites, pedites totidem ac rebus necessariis caeteris, hoste non auso contra ire, cum octo,
752
quae secum is habebat, militum millibus; multum bellici pulveris ad Gallos, qui trans Alpes sunt, missum est. Praeterea comitatus Vinariensi milite dux Longavillanus7 Germeshemum cepit oppidum, arcem oppugnat. Sed creditur junxisse se cum Hatzfeldio8 Piccolominaeus9 et ad Pelsam ire. Bavarici ad Pfershemum erant. Mediolani autem et in Tiroli atque ad Constantiensem lacum multus dicitur miles scribi ad recuperandam Alsatiam, ut quidem caesariani et Hispanici evulgant ad XXX peditum, XII equitum millia. Sed haec supra verum augeri credibile est et partem eorum distinebunt10 novi isti per Italiam Gallorum conatus.Haud dubie ingens est victoria, quae Batavis mari contigit11, magnasque dat occasiones tentandae etiam longinquis in locis fortunae maritimae. Et illorum quidem res egregiae; aliis in locis12 omnibus miserandae sunt res protestantium, qui apud Rhaetos succumbunt, apud Helvetios languent, in Britannia Germaniaque inter se dissident feraliter. Vinariensium autem praefecti ita pecunia Gallica ductari se patiuntur, ut Palatinae domui ab illis nihil boni sperem.
Suedis honorificum est, quod hostis praelium cum ipsis defugit, pacem autem ab ipsis petit. Pro principe Ruperto13, etiamsi quid bonae voluntatis Gallis fuisset, id vereor, ne dispellant novae istae nubes.
A Dano14 Polonoque15 Batavis nihil nisi longas moras et sine rebus verba auguror neque vero puto pro illis esse id, quod nuper inter Daniam Angliamque coiit foedus.
Cardinalis16 spem propinquae libertatis significavit D. electori.
Creditur Hatzfeldius habere sex millia militum, Glenius17 autem et Mercius18 sex peditum, quatuor equitum millia, machinas XXIV. Horum Glenius dicitur se cum Piccolominaeo et Hatzfeldio juncturus.
Constantia civitas neque ab Hispano neque a Bavaro ut praesidium acciperet, induci quivit velut sibi tutandae sufficiens.
Sociabo cum Excellentiae vestrae votis mea pro bona pace ipsique omnia precabor felicissima.
Excellentiae vestrae perpetua observantia devinctissimus
H. Grotius.
Lutetiae, 9/19 IXbris 1639.
Adres: Ludovico Camerario, Reginae Regnique Sueciae Consiliario et Legato apud Praepot. Ord. Foeder. Belgii.
Boven aan de brief in de copie te Uppsala: R. Hagae A.o 1639 d. 17/27 IXbris.
