Search
Add panel
[tiler debug info]
Choose a letter
Illustrissime Domine,
Agitatur iterum haec aula clanculariis molitionibus, quarum pars magna eo tendit, ut regis2 animus religione quadam a bello hoc continuando avertatur.
23
Cardinalis Riceliacus aeger corpore, regis praeterea conspecta infirmitate, quae se per hos dies ad deliquium usque prodidit, servaturus ne sit, quam servavit hactenus, consiliorum constantiam an urgenti nimis oneri cessurus tandem, varia est conjectatio.Dux Bernhardus3 pecunia Gallica instructus habere creditur III milia et quingentos equites, pedites ad bis mille et quingentos. Helvetiis responsum dedit placidum arces se quasdam - quae nimirum oneri magis ipsi quam usui erant - Soloturiensibus, si velint, traditurum. Decessurum de caeteris ad episcopatum Basiliensem pertinentibus, cum primum id belli ratio permittest.
Dux Lotharingus4 a Waertio5, qui in Suevia se tenet, accepit cohores aliquas effecitque, ne Salinas obsidere dux Longavillanus6 posset.
Argentoratum magis magisque tentatur inopia commeatus et commerciorum.
Hanoviam dicit Ramsaeus7 non traditurum se, nisi ducis Vinariensis consensu, qui nunc solus dissoluti federis nomen sustinet. Caeterae spes utrinque bellantium in ver differuntur.
Leganesius8 Ticini haeret. Rhaetos ad responsa Hispaniae rejicit; militem accipit a Monaco et Finali, non ut ante per Genuatium terras, sed longo ambitu adjuvante Ethrusco9. Ejusdem Ethrusci ducis cum ecclesiasticis suae ditionis super farinario vectigali manet controversia. Sabaudus autem cardinalis10 Genuae occasiones et amicorum, quos ambit, responsa exspectat.
Marsillacus11 Bastiliae colonus non diu fuit libertatemque amicorum precibus recepit.
Misere Galli ad principem Arausionensem12, prout responderit, liberalitatem suam adducturi aut laxaturi. Franco sive Burgundiae comitatui otium a bello daturi non videntur, cum dura postulent, inter quae, ut quae ducatus Burgundiae damna pertulit, a comitatensibus sarciantur.
Erfurdum audimus iterum ab hostibus circumveniri et diligenter servari Rheni ripas ejectis jam inde ab omni parte Gallis. Scribitur et damnum passa Austria eluvione Danubii. De Portugallia refrixere rumores.
Opto tibi, Illustrissime Domine, tuisque omnia prosperrima.
Lutetiae, 9 Ianuarii novi calend. MDCXXXVIII.
Excellentiae Tuae observantissimus omni studio
H. Grotius.
Adres: Ludovico Camerario, Reginae Regnique Sueciae Consiliario et Legato apud Praepot. Ord. Foeder. Belgii.
Boven aan de brief in de copie te Uppsala in margine: R. 7/17 Janu. Ao. 1638.
