3471. 1638 februari 27. Aan S. Bielke1.

Illustrissime Domine,

Cessatur his in partibus praeterquam ad Rhenum, ubi Hohentwilae praefectus2 derelicto duce Eberhardo3 in fidem Galliae se commendavit. Post Lauffenburgum, Seggingam, Waldshutum, etiam Henninga duci Vinariensi4 cessit. Cella machinis verberatur. Rhynfeldii ad portas perducta oppugnatio. Brisaci praefectus5 quascunque potest e Suevia aliisque locis copias, ut obsessis subveniat, colligit.

Imperator6 literis Helvetios excitat, ut se duci opponant: Helvetii verbis apud ducem quam armis agere malunt, diversi inter se religionum dissidio et metuentes, ne fedus ipsis suum rex Galliae7 renuntiat, quod legatus Gallicus8 serio minatur.

Pontifex9 Romae fabricat inducias. Angli cum Gallis de maritimis quibusdam praedis transegere.

Princeps Condaeus10 it in Aquitaniam, cui novis cum copiis imminet Hispanus11 Navarra et comitatu Russinonensi pridem captis non contentus. Batavi sub ver moturos se Gallis pro pecunia promisere.

Dux Longavillanus12 a Sedano rediit bellum comitatui Burgundiae parans inferre.

Quid Angli facturi sint forte Hamburgi apparebit. Caeterum dicunter in Hispaniam rursus misisse legatum13.

113

Astrologi reginae14 partum hunc ac deinde alterum promittunt virilis utrumque stirpis.

Pax in Gallia potente ac pleno quamvis virorum regno mirum quam exspectatur a summis, mediis, infimis.

Deus, Illustrissime Domine, eam nobis det bonam tuaeque Illustrissimae domui favens semper adsit.

Tuae Illustrissimae Excellentiae addictissimus
H. Grotius.

Lutetiae, 17/27 Februarii 1638.