Search
Add panel
[tiler debug info]
Choose a letter
Frater charissime,
Nulla de libro περὶ Ἀντιχρίστου2 judicia audire Utenbogardum3 non mirum est, si liber non prostat, quod suspicor. Si ita est, velim scire, per quem id fiat. Mea fuerat
223
voluntas, ne secundus libellus4 daretur nisi prostante primo nec tertius5 nisi secundo. Si id minus curatum fiat, nunc saltem nihil Blaviis6 detur rerum mearum, nisi tria illa prostent ubique mittanturque in Galliam et Angliam et ad me.Pro patre matreque serias et assiduas ad Deum preces fundo gratiasque ago, quod mei natalis more solito memores fuerint.
Golius7 quid dicere velit de Latino numero, non intelligo.
Is motus terrae, de quo scribis8, in omnibus Belgicae et Galliae locis ad Mosam pertinentibus sentiri se fecit. In Tigurino agro infans natus est biceps quaternis manibus ac pedibus. In Bernati arator intra terram carnem reperit sanguine stillantem.
Princeps Arausionensis, si pergit eum vexare podagra, poterit lectica deferri ad exercitum. Caput est quod imperat, non pedes.
Vale cum parentibus, uxore, liberis, mi frater.
Tibi obligatissimus frater
H. Grotius.
21 Aprilis 1640.
Petrum nostrum multum cursitare intelligo: discere Italicum sermonem, ea non discere, quae opus est. Hac via neque mihi placebit, neque sibi ipsi erit utilis. Ego videro, quid faciendum sit.
Mittit ad me vir doctissimus Bulialdus9 haec pertinentia ad illud Οὔλπιος10. In tabulis astronomicis Cl. Ptolemaei, in ejus syntaxi mathematica11, quae manuscripta exstat majusculis characteribus in biblioteca regis christianissimi, hi numeri 26, 36, 46, 6 istis ἐπισήμοις expressi leguntur KS 26, ΛS 36, MS [46] et S 6. Haud dubie Johannes12 Graece scribens Graecas literas respexit, non latinas. Si latinas respexisset, triumpharet Feuardentius13, qui latinis literis Graecorum more ad numeros redactis ait Martin Lauter14 facere 666. Cogor idem saepe repetere meo cum taedio.
Nisi Blavii plane in tribus illis scriptis meam sequantur voluntatem, nihil aliud dicam quam dolere me non invenire me homines fidos; praeterea velle me, ut, si id est, redeant ad me Annotata ad N.T.15, Annotata ad Ius belli ac pacis16 et Historica17 per uxorem18. Ego domi meae quod opus est fecero et tandem consequar quod volo et aequum est.
