544

3743. 1638 augustus 24. Van P. de Groot1.

Venerande parens,

Gaudeo venisse ad vos Pelzii filium2. Spe(ro) multum tibi levaminis accessurum ex ejus opera.

Libros, quos per Treselium3 misi, brevi ad vos perventuros non dubito; de iis, quos a D.o Corcellio4 editos vel edendos sc[r]ibis, nihildum certi habeo. Ubi eos prodiisse intellexero, faciam vos exemplorum aliquot compotes.

Dissertationem eam de caena ubi pastores non sunt5, spero jam acceperis legerisque; gaudebo tuum praesertim de ea judicium intelligere. Pauci hic sunt ejus rei vel intelligentes vel curiosi; mihi ea forte in manus et quidem opportune incidit, cum ante paucos dies cum avunculo senatore6 super eodem argumento sermones habuissem. Ille multum adversabatur mihi in ea sententia, quam ego ex iis, quae Lutetiae mihi legenda dederas, didiceram, ubi, si non omnia, pleraque saltem eadem, quae in hac dissertatione inveni. Miror eam dissertationem ab eo viro7 editam; est enim vir acerrimus pastoribusque Calvinaismi adeo addictus, ut nobis ab ejus opera nihil boni sit expectandum. Curabo tamen et illius et Jansonii8 typorum exempla ad te mitti. De Meierosianis libris9 scripsi ad avunculum10.

De victoria ducis Vinariensis11 hic non dubitatur, nec magis de Geldria obsessa. Die Saturni praeterito huc pervenit regina Galliae mater12. Multi sunt hic super ejus adventu sermones et varii pro affectuum varietate.

Legatus Ordinum, qui in Anglia est13, scribit exspectari ibi reginam praepararique navem ad eam eo vehendam.

Deum precor, venerande parens, ut omnia vobis ex voto procedant,

Tibi obedientissimus filius
P. Grotius.

Hagae Comitis XXIV Aug. An. MDCXXXVIII.

Adres: Monsieur Monsieur L'Ambassadeur de Suède à Paris.

In dorso schreef Grotius: 24 Augusti 1638 P. de Groot.