4422. 1639 december 10. Aan A. Oxenstierna1.

Excellentissime atque illustrissime domine,

Commovit non parum hanc aulam perlatus huc nuntius displicuisse valde in Suedia pactiones Gallorum cum Vinariensibus, per quas tota vis imperii militaris et in urbes ad Gallos transiit. Solet interdum tempestates tales excitare D. Davausius2, ut ipse eas postea industria sedasse videatur. Ego mihi ea de re loquentibus dixi nondum accepisse me e Suedia aut mandata super ea re disserendi aut etiam excellentissimorum dominorum regni rectorum3 judicium super illis pactionibus.

Urbs Taurinorum ex arce globis petitur non sine turrium atque aedium ruinis.

Spargitur hic rumor de Longavillano4 quasi Maguntiacum obsidente, sed credunt plerique id, quod et nuper scripsi5, eum ad Metim hiberna quaerere.

Res electoris Palatini6 nihil mutatur nec quicquam adhuc ad Anglia audimus, quod nobis spem det meliorem. In Vinariensi exercitu sunt, quibus hoc principis Palatini infortunium dolet, sed communi eorum nomine nihil hic ea de re agitur.

Scotici motus ad resumenda arma spectare videntur; ea res metum multis injicit, ne rex Angliae7 domandis Scotis solus impar, quibus ob religionem Batavi, ob veteres amicitias et speratas utilitates Galli non parum favent, ad Hispani amicitiam apertius se vertat.

Ragotskium8 aliquid ausurum in Hungariam vix credibile facit frigide acceptus Constantinopoli legatus ejus9, contra magno cum honore caesarianus internuntius10.

Turcae11 adhuc apparatus mari magis quam terra bellum ab eo exspectari jubet in Melitem forte.

800

Bavarici ad utramque Rheni ripam sunt et Argentoratensibus amnis usum, quantum possunt, praecludunt.

Episcopi Basileensis12 terrae a Vinariensibus aliquoties vexatae contra autem belli instrumenta, quae ad Vinarienses ibant, detenta Badae iras et minas inter hos et Helvetiorum pontificios peperere. Galli episcopo suum favorem promittunt, dum per ejus terras iter hominibus rebusque habeant.

Hispani vulgant proelii apud oppidum Quieres aequale fuisse damnum. Sit ut ita sit, multum tamen effecit Harcurtius13, quod evasit.

Pars seditiosorum in Normannia caesa est a regiis, captus et dux eorum, qui presbyter erat Morellus14 nomine.

Castilionaeo15 in Mousonum insidiae non successerunt.

Ducis Lotharingi16 copiae in Luxemburgico et Treverico agro hiemem transigent.

Mazarinus17 hic exspectatur de pacis rebus acturus.

Deus, excellentissime et illustrissime domine, res regni reginae18 tuaeque Sublimitatis secundet.

Tuae Sublimitatis cultor devotissimus
H. Grotius.

Lutetiae, 10 Decembris 1639.

Saepe molestus esse cogor Sublimitati tuae de re pecuniaria in praesens ac futurum non meae tantum tranquillitatis, sed et decoris publici causa. Rex Galliae19 iterum mihi liberalitatem suam obtulit. Excusavi; non spero futurum, ut cogar mutuum ab eo accipere, quod dono habere potui.

Venit huc hodie ex Anglia Windenbankius20, filius secretarii status regii21 in Anglia, cum sui regis ad regem Galliae et ad electorem22 literis. Parum favorabilem eum facit rumor patrem ejus ferens Hispanis amiciorem quam Gallis.

Audimus colluctatum cum Hallerio23 ducem Lotharingum; Glenium24 Gustavoburgi esse; captum a Longavillani copiis Oppenhemum et Alzhemum et Bingam, a Vinariensi milite Therbachium ad Mosellam, a Konigsmarkio25 Hervordum et Bilefeldum, fruges e Gallia illatas Metim partim ab hoste interceptas.

In proelio ab Abricantos contra seditionis populares multi viri nobiles cecidere, inter alios marchio Curtamerius26.

Piccolominius27 apud Rotteburgum transiisse dicebatur.

801

Susurratur aliquid de indutiis apud Salzam.

Rex nuntio pontificio28 aditum ad se negavit ob ea, quae Romae acta sunt.

Adres: Axelio Oxenstiernae, Sacrae Reg. Maj. Regnorumque Sueciae Senatori et Cancellario.