Search
Add panel
[tiler debug info]
Choose a letter
Mi frater,
Venient, ut spero, per Vickefordium2 in manus tuas binae tuae effigies a Mireveldio delineatae3, quas linteis superimponi tabulis curavi quo minus ex itinere damni sentiant; eas tibi placituras confido.
Per eundem misi et amicorum libros aliquos, imprimis Giselbertium Amstelium tibi a Vondelio dicatum4, poema sane elegans et heroici spiritus; tragaedia ab omnibus praesertim bonis avide legitur et probatur et quinquies aut amplius Amstelodami publice acta placuit.
Addidi et Junii de pictura veterum libros5, multi laboris, multae curae opus; ego certe subinde miror unde tam multa et quidem non cuivis obvia eruerit et quomodo tam accurate pertexuerit commentarium.
Invenies inibi et litteras Vossii6 veteres illas quidem et mihi cum libro7 traditas, sed tamen gratas tibi, ut puto, futuras, quas jam diu ad te misissem, si hoc ei animi - ut nuper praesens intellexi - ei fuisse conjectura assequi potuissem.
Tradidit et mihi Heinsius filius8 Bredam expugnatam9, carmen sane luxurians; si pro munere epistolio gratias agere volueris cum aliqua parentis10 commemoratione, mirifice utrumque devinxeris.
234
Salmasii liber de usuris11 ingens pro materia, quem ipse ad te deferendum mihi dari jussit, multa habet reconditae eruditionis neque pauca a vulgo etiam jurisconsultorum recedentia; video ei in summa bene tecum convenire, Heinsius carpi se aliquoties aegre fert. Illud nescio, an ei quorundam odia non sit conciliaturus, quod mercaturae et faenoris tam strictam urget comparationem: hoc scio, Cloppenburgio12 aliisque scriptum hoc minus probari, forte propter canones ecclesiae illic citatos.
Denique et adjungi voluit Utenbogardus13 Gorselii14 examen doctrinae Amiraultii15 et Testardi16, in quo libro egregie effata istorum virorum cum Molinaeanis17 decretis committuntur, unde veritati apud animos praejuditiis non gravatos magna lux procul dubio accedet.
Wassenarii ejusque asseclae scripta18 omnia quidem repperi Amstelodami, sed partes vendere bibliopola nolebat, ego in mandatis dedi, ut alicubi conquirantur IV et XII pars; reliquas post XVI facile inveniam.
Eum, qui haec ad te perferet, Vickefordium, scio non egere mea apud te commendatione, hominem suo merito tibi carissimum; alioquin etiam filiorum19, qui apud ducem Vinariensum20 sunt, nomine rogassem, ut omnia ipsi officia praestares.
Vale, frater optime, cum uxore, liberis21 et amicis.
Tibi obsequentissimus frater
Guilielmus Grotius.
Hagae, XXV Aprilis 1638.
Adres: A Monsieur Monsieur Grotius, Ambassadeur de Suède A Paris.
In dorso schreef Grotius: 25 April 1638 W. de Groot.
En boven aan de brief: Rec. 15 May.
